Alcoa gefur tilbaka

Margir bölsótast yfir því að nú sé verið að leggja enn eitt landsvæðið undir lón og aur, auk þess sem reisa á enn eitt álverið, en þau eru bæði ljót og menga mikið. Ekki bætir úr skák að sífellt fleiri hagfræðingar virðast vera að komast að þeirri niðurstöðu að framkvæmdir landsvirkjunar á austurlandi séu hreinlega óhagkvæmar. Ef rétt reynist erum við auðvitað að tala um gríðarlega fórn svo að tapa megi peningum og færa megi karlmönnum með iðnmenntun og verkamönnum slatta af störfum í landshlutanum.

Hvernig má vera að framkvæmdirnar séu óhagkvæmar? Jú, mikil ríkisafskipti og þensla í kjölfar þeirra hafa styrkt íslensku krónuna svo um munar. Þegar krónan hefur svona sterka stöðu gagnvart öðrum gjaldmiðlum eykst einkaneysla samhliða minnkandi útflutningi, þar sem íslenskar vörur eru nú orðnar dýrar. Viðskiptahallinn við útlönd eykst því jafnt og þétt í hringiðu orsaka sem orsaka eigin orsakir. Þeir sem ekki skilja þennan óþjála texta verða bara að trúa því að það sem ég segi sé satt.

Margir kjósa að reiðast öllum málsaðilum, Landsvirkjun, Alcoa, Impregillo og hvað þeir heita nú allir saman. En hvað er það sem t.d. Alcoa er að gera? Fyrirtækið vinnur ál. Ekki reiðumst við þeim sem drekka kók úr dós, kaupa sér dýrt hjól, fljúga með flugvélum o.s.frv. Við skvettum ekki skyri á fólk á nýlegum bílum af því að þeir eru með álfelgum. Alcoa er bara fyrirtæki sem gengur út á að framleiða vöru sem mikil spurn er eftir í heiminum. Í samanburði fjölmiðla við önnur álframleiðslufyrirtæki hefur alcoa ævinlega komið vel út og enn einu sinni vil ég minna á að ef ekki á að framleiða álið á Íslandi þá verður það bara framleitt annars staðar.

Ég get ekki sagt að ég sé fullkomlega hlynntur eða fullkomlega andvígur virkjun. Ég hef hins vegar margt út á framkvæmdina að setja, s.s. vafasamar aðferðir við umhverfismat og auðvitað hræðilega hagfræði ef íslenska þjóðin á að endingu eftir að tapa á öllu saman. Alcoa hef ég þó ekkert á móti. Ég ætla því að benda á að fyrirtækið styrkti nýlega samskipti háskóla í BNA og Íslandi um $ 300.000 og veitti 5 milljónum til styrktar tækjakaupa hjá Heilbrigðisstofnun Austurlands. Þetta kallast að gefa tilbaka til samfélagsins og mættu mörg íslensk fyrirtæki taka sér þetta til fyrirmyndar. Það er yfirlýst stefna Alcoa að bæta lífsgæði í þeim samfélögum sem koma að álframleiðslu og þykir mér nokkuð til þeirra stefnu koma.

Nú eiga einhverjir eftir að segja að þetta sé auðvitað sjálfsagt, enda eigi Alcoa eftir að hagnast mun meira á álverinu en sem þessu nemur. Það er nú samt þannig að mörg fyrirtæki eru ekki jafn örlát á gróðann og vona ég að meira að segja verstu náttúrufasistar geti samglaðst þeim sem hljóta styrki.

Sunnudagskvöld með Árna Gunnari

Þessa dagana er mikið að gerast. Fyrst ber að nefna að tölvukerfi jósef-k. hefur verið endurnýjað og með betri tækni koma betri tímar. Annað og ómerkara er t.d. framboð Gísla Marteins, stjórnarskrárdrögin í Írak, brottflutningur frá Gaza o.fl. skemmtilegt.

Ef við lítum á stöðu Gísla Marteins Baldurssonar þá verð ég að segja að maðurinn er augljóslega snillingur. Mér sýnist Gísli hafa farið hárrétta leið upp metorðastigann innan flokksins. Sjálfstæðisflokkurinn er gríðarlega stór og erfitt að skara framúr sem stuttbuxnastrákur. Gísli Marteinn hefur ekki reynt að vera áberandi innan flokksins heldur utan hans og sankað þannig að sér ótrúlegum fjölda aðdáenda. Fyrir þetta fær hann tvö, ef ekki þrjú, prik frá mér persónulega.
En ég hef verið í vandræðum með það hvernig ég eigi að taka þessum fréttum. Ég tel nokkuð víst að Gísli Marteinn muni sigra í prófkjöri. Mér finnst hann líka mun álitlegri kostur en Vilhjálmur Vilhjálmsson, enda er hann einhver sviplausasti pólitíkus síðari ára og ætti að taka við samgönguráðuneytinu af Sturlu Böðvarssyni, þeim allra sviplausasta í bransanum.
Það sem ég þarf að gera upp við mig er: Vil ég að Vilhjálmur vinni prófkjörið og minnki þannig líkurnar á að sjálfstæðisflokkurinn komist til valda, eða vil ég að þegar sjálfstæðisflokkurinn tekur borgina verði það a.m.k. Gísli Marteinn sem verður borgarstjóri?
Eftir óhemju lélegt ár hjá R-listamönnum veit ég satt að segja varla hvort ég vilji að sama óhæfan haldi í borgina. Ég hef reyndar ekki hugmynd um hvaða borgstjóraefni ég vildi frekar sjá en Gísla Martein. Ekki finnst mér Stefán Jón góður kandídat, Árni Þór er bölvaður durgur og alls ekki fabúlus þrátt fyrir kynhneigð sína, Björg Birgis er hörmung og Steinunn Valdís er alltof lítið spennandi. Kannski Dagur B. Eggerts, sem nú ætlar að flýja land, væri skásti kosturinn. Ég er því margklofinn að innan í þessu máli en verð sennilega búinn að ákveða mig í næstu viku.

Báknið byggt upp

Það líður oft stuttur tími áður en maður fattar að maður hafi gert mistök. Ásláttravillur er t.d. villur sem maður tekur eftir og leiðréttir strax. Sumir sjá mistök sín og neita að leiðrétta þau, hafa jafnvel ekki vald til þess eða bara ekki minnsta áhuga. Geir Haarde er einn þeirra.

Síminn hefur verið seldur. Það ættu að vera góðar fréttir fyrir marga. Ég get þó ekki sagt að ég sé ýkja hrifinn. Síminn er seldur fyrir æðislega gott verð og grunnnetið með. Nú er þetta grunnnet notað til að senda út fótbolta og öðrum fyrirtækjum er neitað um bita af kökunni. Ekki nóg með það heldur ætlar síminn að narta af kökum annarra með því að bjóða enska boltann einungis í gegnum adsl þjónustu hjá sér.

Þetta væru í sjálfu sér bara venjulegir subbulegir viðskiptahættir ef ríkið hefði ekki skipulagt þetta allt saman. Það var jú stjórn símans í umboði fjármálaráðherra sem ákvað að kaupa skjá einn. Varla voru þau kaup gerð til að fá að reka sjónvarpsstöð sem hefur verið að drulla á sig frá stofnun. Það hlýtur einhver viðskiptaáætlun um eitthvað hagkvæmt að hafa legið að baki. Og það kom fljótlega í ljós að síminn ætlaði einfaldlega að selja adsl og breiðbandsþjónustu með kaupunum.
Geir Haarde treystir yfirburða stöðu Íslands á fjarskiptamarkaði!!! Ísland er langstærst á Íslandi!!!

Svona hefðu fyrirsagnirnar getað litið út án þess að ýkjur eða lygar kæmu nálægt.

Það hlýtur að teljast undarlegt þegar einn helsti boðberi frjálshyggju á norðurlöndum býr þannig um hnúta að ríkisfyrirtæki haldi yfirburðastöðu á samkeppnismarkaði. Að það sé örugglega svo stórt og með svo mörg tromp á hendi að þegar það er selt eigi enginn séns í það, ekki næstu 200 árin a.m.k.

Af hverjur gerir Geir þetta? Er það til að hefna sín á 365 eftir fjölmiðlafrumvarpsumstangið? Er það til að fá sem mest verð fyrir símann? Það væri varla í anda frjálshyggju að reyna að hífa sem mesta peninga inn í ríkissjóð á kostnað stórfyrirtækja.

Hver svo sem skýringin kann að vera er þetta auðvitað vægast sagt ógeðfellt mál. Ég skil ekki hvernig hægt er að gagnrýna umsvif orkurveitunnar, sem eru þó gagnrýniverð, á meðan síminn er að versla sjónvarpsstöðvar til að halda í einokunartilburðina.

Jósef-K. óskar samkynhneigðum til hamingju með daginn og vel heppnaða göngu.